WILLEMSTAD.- E kantante multitalentoso Ӕmy ta lansa un produkshon nobo. Despues di algun ratu den su laboratorio musikal, Ӕmy ta presentá su di 10 ‘single’ titulá “Mi Mester di Bo”. E produkshon aki ta salí direktamente en konekshon ku e trayekto di transishon di hospital St. Elisabeth, pa hospital nobo, Curaçao Medical Center. E tim di transishon di Hospital Nobo Otrobanda (HNO) a aserká Ӕmy pa komponé un kansion i produsí un video ku e meta pa inspirá na promé lugá tur empleado, pero tambe tur ku ta direktamente envolví den e trayekto di kambio. HNO a duna Ӕmy libertat kreativo pa bin ku un mensahe positivo, impaktante i ku ta basá riba e 4 fasenan di e trayekto di kambio: Konfia, Integrá, Komportá i Uni. Basá riba esaki, Æmy a komponé un kansion ku kontenido líriko, kompañá pa un video produkshon pa por inspirá Kòrsou kompleto pa ban pa un futuro nobo. Mi mester di bo i abo di mi, pa #huntu nos krea un #UnFuturoNobo. Ku e mensahe aki Curaçao Medical Center, ke sirbi komo e katalisadó pa alkansá un futuro nobo pa e pueblo di Kòrsou. For dia 7 di novèmber e video clip ta visibel riba Youtube (https://www.youtube.com/user/Nenaniafeliz), e paginá di Facebook di Æmy (https://www.facebook.com/Niafeliz), i ademas riba wèpsait di HNO (www.hno.hospital). Pueblo di Kòrsou, abitantenan di nos hermana islanan Aruba i Boneiru i tambe nos hendenan na Ulanda i otro partinan di mundu disfrutá di e tremendo kansion inspirativo aki. Æmy ta apresiá ku e tim di HNO a dun’é e oportunidat di ta parti di e echo históriko di un Hospital Nobo pa Kòrsou despues di 163 aña. Un hospital nobo i ultramoderno pa nos pueblo. Æmy ta spera ku e produkshon nobo aki por trese unidat i amor no solamente den sektor di kuido sino tambe den tur sektor di labor. Disfrutá di e kansion, awor disponibel na tur radio emisora, televishon i riba medionan sosial.