WILLEMSTAD.- Ayera tardi a tuma lugá e presentashon na prensa dje evento ‘Curaçao Reggae Festival’, un konsierto di dos dia kaminda un ‘line-up’ di artistanan di e género di Reggae tantu lokal komo internashonal lo presentá. ‘Curaçao Reggae Festival’ lo tuma lugá na Curaçao Festival Center riba dianan 1 i 2 di novèmber 2019, kuminsando for di 9 or di anochi pa 3 or di mardugá, ku presentashon riba 1e di novèmber di artistanan: Alpha Blondy, Big Mountain, Rasta Farley i J-von di Ulanda. Riba 2 di novèmber lo tin presentashon di Ky-mani Marley, TK Dube ku un tributo spesial na Lucky Dube, ThuThu, Kevin Isaac, Uprising Band i Junior Tecla. Karchinan pa sekshon general i ‘front stage’ ta optenibel na Bruna, Mensing’s Caminada, Bottles Curaçao, Madero Lifestyle shop, Van den Tweel Zeelandia, van den Tweel Jan Thiel, Beep Beep Rio Canario i Beep Beep Marie Pampoen. Por reservá paketenan di VIP yamando 888-8680 òf 685-2287 entre 8 or pa 5 or.