ORANJESTAD.- Polis di Aruba a harma un kontrol di tráfiko grandi den Oranjestad, ku yudansa di vários departamentu di e kuerpo, asina bosero polisial ta informá. E kontrol a tuma lugá djarason 7 di òktober último kuminsando den oranan di atardi pa anochi. E parti prinsipal di e kontrol tabata dirigí riba ekseso di velosidat. No ménos ku 100 but a keda repartí durante di e kontrol aki.

E kontrol tabata grandi i a konsentrá na diferente punto stratégiko e.o Avenida Watty Vos na altura di rotònde di Bushiri i tambe a kontrolá na altura di A.P.A. E unidat motorisa i tambe departamento di D.T.P. i CEA a forma parti di e kontrol di tráfiko aki. Di e 100 butnan repartí mester apuntá ku 64 shofùr a surpasá e velosidat máksimo den e área.

E sobrá kasonan tabata esnan ku no tabata kumpli ku reibeweis, seguro, impuesto di plachi number i keuringskaart na òrdu. A kai un detenshon tambe pa un persona ku no tabatin papelnan di estadia.

Kuerpo Polisial Aruba lo sigui ku kontrol den tráfiko i ta kòrda tur outomobilista pa perkurá pa nan tin nan dokumentonan di e vehíkulo presente i bálido. Ademas, tur shofùr sòru pa baha bo velosidat, pone selular un banda, si bo ta bebe no stür i kumpli ku reglanan di tráfiko. Un tráfiko sigur ta responsabilidat di tur hende.