WILLEMSTAD.- Mañan, djasabra 18 di novèmber lo tin e Semi Final di Luna Yen, e show di talento pa Hubentut 8’or di anochi na Zona Kultural, sala La Tentashon.
13 partisipante lo ta kompitiendo pa wak ken ta esnan ku lo bai e gran Final di Luna Yen dia 2 di dezèmber.
E team di Luna Yen a organisá un total di 3 oudishon pa asina reklutá hóben rònt Kòrsou. Dos den La Tentashon dia 28 di òktober i dia 1 novèmber i un na Sentro di Bario Montaña  dia 4 di novèmber 2017.
E hóben/gruponan ku lo ta kompitiendo ta: Flow  Magic (Baile), Naetisha Rosaria (Kanto), Dilara Tramm (Kanto), Christefer Damiana (Aktuashon), Swarovski Dancers (Baile), Eugendemar Chirino (Baile), The Royal Diamond (Baile), Big G (Rap),  Cardioe Nepomuseno (Kanto), Thadisha Theodora (Kanto), Richardino Ferdinandus (Kanto), Berverly Maduro (Kanto) i Raymick Martha (Aktuashon).
Henter pueblo di Kòrsou ta keda invitá pa djasabra aki 18 di novèmber 8’or di anochi na La Tentashon. Bin apoyá e hóbennan aki i wak ken ta bai e final. Karchi na rason di 5 florin ta optenibel na Zona Kultural ántes (Teatro Luna Blou)
Pa mas informashon por yama na Zona Kultural (Teatro Luna Blou) na 462-2209.