ORANJESTAD.- Aruba a habri djasabra mainta ku e notisia fèrfelu ku warda kosta a topa ku un boto na altura di santana di kachó. Den e investigashon ku a sigui a bin topa ku dos kurpa sin bida ta drif den laman. E informashon di polisial di Aruba ta indiká ku e patruya ku ta kontrolá kosta a topa ku e boto 03:55. Nan a pidi asistensia di patruya di San Nicolas i tambe polis marítimo huntu ku warda kosta.

Polis di Aruba a informá ku a logra detené 3 persona ilegal no muchu leu for di unda a topa e boto. Ta asina ku un ratu despues patruya di kosta a topa un kurpa sin bida, no muchu leu for di unda a topa u e boto. Dr. Texier a konstatá morto 07:15 di mainta. No a topa ku ningun identifikashon di e persona maskulino sin bida.

A pidi pa helikòpter di warda kosta i den nan búskeda nan a señalá un otro kurpa sin bida den laman. A trese e kurpa tera unda dr. Texier a konstatá e morto ei pa 08:45 di mainta. Tabata otro kurpa maskulino ku no tabatin niun identifikashon. Departamento tékniko tambe a yega na e sitio pa hasi nan investigashon. Slachtofferhulp tambe a keda notifiká. Despues di un ratu patruya a topa ku un persona mas den e bario Colony i detené e persona i pas’e pa personal di GNC.