PUERTO RICO.- Elvis Crespo konosí pa e frasenan ‘Eh la cosa!’ i ‘Pequeña echate pa’ acá’ ku kua e ta koutivá su siguidónan, a sigui e rekomendashon di su fanátikonan pa e kuminsá su karera komo solista despues di a forma parti di ‘Grupo Mania’ na prinsipio di dékada 90 kaminda el a graba tres albùm.
Crespo a firma un akuerdo ku Sony Music i a kuminsá traha riba su promé albùm sin ku e ehekutivonan di Sony tabata na altura. Nan a pidi e merenguero pa e no graba nada pasó nan lo supervisá henter e proseso di grabashon.
Crespo ta kòrda kon e tabata bai un studio di grabashon den oranan di mardugá i tabata traha riba e produkshon musikal ‘Tu Sonrisa’, pero ku tur kos a kambia riba un dia den luna di òktober 1997, na momentu ku e tabata baña i a kuminsá kanta ‘Suavemente, besame, que quiero sentir tus labios, besandome otra vez’.
‘Suavemente ta mi Mona Lisa’, ta e úniko kansion na spañó ku a keda toká den e transbordador ‘Discovery’ na 1999’, asina Crespo orguyosamente a indiká durante di un entrevista.
Un luna despues di e dia, Crespo a keda yama pa un reunion ku ehekutivonan di Sony pa kuminsá prepará e produkshon, pero e artista tabatin un sorpresa pa nan. El a bai ku un kasèt ku e ritmo di dos kansion, inkluyendo ‘Suavemente’ ku a sali dia 14 di aprel 1998 riba merkado, sobra ta historia.
‘Tabata e mihó desishon di mi bida, paso tin un Elvis Crespo, promé i despues di ‘Suavemente’. Na momentu ku e albùm a keda lansá nan a bende 50 mil kopia den e promé siman i el a risibí un nominashon pa Grammy Awards.
‘Lo mi bai for dje mundu aki i e albùm ei lo ta un klásiko i un referensia, asina Crespo a enfatisá.