WILLEMSTAD.- Noche buena, friu i festivo lo mester tabata e ambiente ku tabatin na 1818 den e iglesia ‘San Nicolas’ na Austria, eksaktamente 200 aña pasá na momentu ku pa promé biaha, na aleman, a interpretá e kansion ku despues a kombertí su mes den e kansion mas popular na nivel mundial ‘Stille Nacht’.
E letra dje kansion a keda skibí pa e músiko austriako, Joseph Mohr na 1816. Pero el a hiba esaki pa su mener di skol i organista di Iglesia, Franz Xaver Gruber pa pidié yud’eé ku e komposishon musikal i kompañamentu ku kitara.
Austria, 200 aña despues a plania un agènda kultural pa selebrá e éksito dje tema navideño. Entre e mas ku 600 evento tin eksposishon, konsierto, pelíkula, obra di teatro, konferensia, simposio i publikashonnan kaminda lo presentá e historia i leyenda ku e kansion aki a trese kuné.
‘Stille Nacht’ atraves di añanan a keda kanta kada Pasku na mas di 300 idioma i dialekto. Sin importá kiko ta pasando e ta keda un komposishon ku ta yama pa speransa i alegria den e fechanan aki. Ta ser kalkulá ku e tradukshon di e letra ta superá 300 pa e popularidat enorme ku e tin. E melodia ta konta un manera fásil pa interpretá i pa kòrtiku ku e ta e ta hasi mas fásil pa adapt’é.
‘Stille Nacht’ ta un dje dje Patrimonionan Kultural Inmaterial di Humanidat di Unesco.
Artistanan na nivel mundial ku a interpretá e kansion ta Christina Aguilera, Andrea Bocelli, Laura Pausini entre otro.
Su mensahe di pas i speransa ta dje real ku durante di promé guera mundial esaki a keda kanta na ingles i aleman pa algun sòldat durante dje ‘Tregua di Pasku’ na 1914. Tabata e úniko kansion di Pasku ku tantu e alemannan i británikonan tabata konosé.