WILLEMSTAD.- Ayera mardugá Wardakosta a wanta riba laman djis pegá na kosta sùit di Kòrsou un ‘go fast’ chikí ku 22 persona primí riba otro den dje.

Segun e informashon di wardakosta, den kareda di 2’or di mardugá e boto di wardakosta Jaguar a detektá riba radar na 6 mia sùit di Kòrsou un boto. Mesora a manda e super RHIB di wardakosta komo sosten pa e akshon. Na mas òf ménos 3 mia i mei sùit di St Annabaai a topa e ‘go fast’ sin lus, unu estilo Eduardoño ku velosidat haltu biniendo direkshon di Kòrsou.

A wanta e boto i a bai kuné direkshon di Parera na e stashon di Wardakosta kaminda a konstatá 22 persona, tur venezolanonan di kual 3 hende muhé i 19 hende hòmber riba e boto. manera nos a bisa kaba i segun e informe di wardakosta, ta trata aki di venezolanonan.

Banda di kier a drenta nos isla di forma ilegal, nan tabatin un kantidat di mariwana huntu ku nan. Tantu e boto komo e droga e keda konfiská.
A entregá e venezolanonan na polis pa mas investigashon.