WILLEMSTAD.- Awe nos ta rekordá ku 25 aña pasá ku e kantante portorikeño, Hector Lavoe a fayesé.
Konosí pa su gran éksito ‘El Cantante’, e intérprete Héctor Juan Pérez Martínez a bandoná Ponce, Puerto Rico, kaminda el a nase, ku 16 aña di edat pa e bai biba serka su ruman muhé na New York pa purba su suerte na ‘The Big Apple’.
‘El Cantante’, komponé pa e kantante panameño, Ruben Blades i e areglista merikano di orígen portorikeño, Willy Colon a resultá un dje gran éksitonan di Lavoe.
‘"Y nadie pregunta, si sufro si lloro, si tengo una pena, que hiere muy hondo. Yo soy el cantante, porque lo mío es cantar y el público paga para poderme escuchar’, asina parti dje letra dje kansion ku a aparesé riba ‘Comedia’, e di tres disko di Lavoe ku a keda publiká na 1978.
E kombinashon di Lavoe i Colon a keda splika pa Cesar Miguel Rondon den ‘Salsa – Cronica de la Musica del Caribe Urbano’ komo e zonido eksklusivo di New York, karakterisá básikamente pa su holó di kaya, pa tin e bario komo su úniko distintivo i pa ta radikalmente diferente na tur loke a zona ántes.
E kolaborashon di Lavoe i Colon, despues di a ser kontratá pa e seyo di ‘Fania Records’ i pa su famoso konsiertonan komo ‘Fania All Stars’, a resultá un éksito rotundo. Entre 1967 i 1975 nan a graba éksitonan manera "Te están buscando", "Che Che Colé", "Te conozco", "Juana Peña", "Barrunto", "La murga", "Piraña", "Soñando despierto", "Aguanile", "Todo tiene su final", "Calle Luna, Calle Sol" i "El día de mi suerte".
E éksito a kontinuá tambe despues di nan separashon, ounke esaki no tabata definitivo paso nan a sigui kolaborá i komo solista Lavoe a konsagrá su mes ku temanan manera: "Rompe Saragüey", "Periódico de ayer", "Juanito Alimaña" i "Plato de segunda mesa".
E kantante a konosé tambe a parti skur di fama. Ku e apodo ‘El Cantante de los Cantantes’ o simplemente ‘La Voz’, e la kuminsá bira notisia pa su problemanan ku alkohòl i droga.
1987 a resultá un aña difísil pa e kantante kaminda algun famia serkano di dje a muri entre nan su úniko yu hòmber i pa kolmo su kas a kima, motibu pa kua el a tira su kurpa for di un bentana. E aña siguiente nan a diagnostik’é ku aids, loke el a kontraé aparentemente pa uso di un angua infektá, segun relato di su ruman Priscila den un dokumental.
Na 1988 den un intento frakasá pa regresá den farándula un konsierto di Lavoe na Puerto Rico ta keda suspendé durante di su presentashon pa motibu ku tabatin tiki públiko. E humiashon aki a pone ku 1 dia despues Lavoe a tira su mes for di piso 9 di un hotèl lokal. Un dak a suavisá su kaida, pero e leshonnan a lag’é gravemente heridá. Sinku aña despues riba un 29 di yüni di 1993, e kantante a fayesé pa motibu di atake di kurason den un hospital na Queens.
Awe, 25 aña despues Lavoe ta sigui ta un referente pa hopi vokalista.