47% mas oudiensia ku kuart final di USA na 2017

WILLEMSTAD – No tin duda ku e selekshon nashonal di Kòrsou a hasi un impakto enorme e aña aki den e torneo Gold Cup. E kobertura ku Kòrsou a risibí tabata impagabel i ademas di laga un bon impreshon atras. E resultado tambe tabata unu satisfaktorio i ku por sigui krese riba dje. E progresá tabata bisto tantu riba tereno di wega pero tambe e oudiensia ku a sigui wega di Kòrsou i sigur e último wega di kuart final kontra di Merka mes. Kòrsou a bataya fuerte ku e merikanonan ku a gana ku e skor mínimo di 1-0. Manera por imaginá tur transmishon ta keda midi pa e oudiensia na Merka i kuantu esaki a trèk i sin duda e resultado pa e wega entre USA i Kòrsou tabata unu positivo. Un total di 1.55 mion persona a sigui e wega aki riba Fox Sport 1, un mehorashon di 44% den su klasifikashon i 47% mas oudiensia ku e mesun kuart final aki na 2017 entre USA i El Salvador.  E kobertura di Univison a risibí 1.6 mion televidente. Pues un total di kasi 3.2 mion televidente na Merka so a wak e wega eksitante entre USA i Kòrsou. Esaki ta tipo di sifranan ku tambe ta hopi importante pa nos selekshon nashonal di futbòl. Pa un indikashon e wega entre Kòrsou a haña mas oudiensia na Merka ku e wega di hende muhé entre Ulanda i Hapon, a haña mesun oudiensia ku e wega di beisbòl di djadumingu anochi entre Atlanta Braves i New York Mets.

T