WILLEMSTAD.- Fina Dance Art School/Simia Dance Company a haña e grato notisia ku 3 di su bailarinnan a risibí nan diploma di ‘Bachelor’ i huntu ku Regine Pieters na luna di mei nan ta forma 4.

Justin Brown a gradua komo bailarin profeshonal na ‘Codarts Hogeschool voor de Kunsten’ na Rotterdam. Lisa de Lannoy  a gradua komo dosente di baile na  ArtEZ  Hogeschool voor de Kunsten, Arnhem i Sharité Oleana  a gradua komo dosente di baile tambe na CODArts, Hogeschool voor de Kunsten, Rotterdam. Tur tres ta ofisialmente profeshonal riba nan tereno.
Durante su stazje Justin Brown a baila komo bailarin di baile moderno i kontemporáneo na Staatstheater Mainz, Alemania.  Por lo pronto, Justin  lo establesé na Ulanda. Na Ulanda e lo tin oportunidat di traha den sektor “freelance”  rònt Europa.  Di e forma aki e por konsentrá,  den su tempu liber, riba otro interesnan manera e.o. arte visual, filosofia pero tambe studia Sciensia, Literatura i ‘Social Studies’.

Lisa De Lannoy  a gradua komo  dosente di baile, bailarina, koreógrafo i empresario.  Alabes el a optené sertifikadonan riba tereno  di ‘fitness’ kual ta instruktor di Zumba i Yoga. Lisa ta duna 21 ora di lès pa siman ku e ta kombiná ku su trabou di kordinadó na Squash Fitness Centre na  Arnhem. Próksimamente Lisa lo kuminsá studia na PABO LO1 pa por traha den enseñansa na momentu ku e bin bek Kòrsou.

Sharité Oleana, a gradua tambe komo dosente di baile, bailarina, koreógrafo i empresario.  Su eksperensia na Codarts tabata mentalmente i físikamente hopi pisa. E ta eksigí hopi di abo komo persona.  Aña pasa ela kore stazje  na FinaDanceArtSchool . Pa su tésis el a usa e tema di identidat. Shari ta keda Ulanda pa hasi su Masters den “Kunsteducatie.”  E lo kuminsá traha komo dosente i su intenshon ta pa sigui desaroyá e diversidat di e profeshon aki. Su deseo ta pa un dia e regresá Kòrsou pa por kompartí su ekspertisio.
Fina Dance Art School/Simia Dance Company  ta sumamente orguyoso di e  kampionnan  aki. Nos ta deseá Justin, Lisa, Shari i Regine tur klase di éksito den e mundu di baile.