TEGUCIGALPA, HONDURAS (AFP).- Honduras e aña’ki a konta 20 morto ku dengue te ku ayera i mas di 30.000 kaso sospechoso di kontagio, e registronan di mas serio den Sentroamérika, miéntras ku outoridatnan ta sigui ku medidanan kontra di e muskita ku ta pasa e enfermedat.
E hefe di Vigilansia di Salú d Honduras, Lorenzo Pavón, a bisa na AFP ku “e kasonan sospechoso di yanüari pa yüni ta 30.009”. Ademas “tin 20 morto konfirmá i otro25 den estudio”, segun el a agregá,
Den 2023, Honduras a registrá 31 morto i mas ku 27.000 kaso, segun sifranan ofisial. E aña di mas pió pa e pais tabata 2019, ku 180 morto i 113.000 hende malu.
Honduras ta e pais Sentroamerikano ku a registrá mas morto pa dengue pa loke ta bai e aña’ki, sigui pa Guatemala (13) i Panamá (12), segun último sifranan dje gobièrnunan.
E manera rápido ku e enfermedat ta keda transmití pa e muskita Aedes Aegypti a pone ku outoridatnan hondureño a deklará “alerta máksimo” pa intensifiká e kombate kontra dje muskita.
Dengue ta un enfermedat endémiko den zonanan tropikal i ta provoká keintura haltu, doló di kabes, sakamentu, doló di múskulo i, den kasonan mas grave, sangramentu ku por kousa morto.
Organisashon Mundial di Salú (WHO) den aprel di 2023 a atvertí ku dengue i otro enfermedatnan kontagiá pa muskita ta plama muchu mas pa motibu dje kambio di klima.
