CARACAS, VENEZUELA (AFP).- E dirigente liberal Maria Corina Machado a denunsiá ku 37 aktivista a keña detené e aña’ki den pleno kampaña pa elekshonnan di 28 di yüli, den kua presidente Nicolás Maduro ta buska un di tres mandato konsekutivo.
“Loke ku nos ta bibando awor aki na Venezuela ta e régimen kriminalisando e aktividat elektoral i e kampaña, i pa e aña’ki so ya 37 dirigente i lidernan polítiko i sosial a keda detené pa e tirania”, segun Machado a bisa na periodistanan.
Di e sifra ei, 10 ta direktamente envolví den e komando di kampaña di Machado. Tin otro seis ku ta “bou di protekshon den embahada di Argentina”, segun e opositor menshonando nòmber di e 16 ku ta arestá.
E dirigente, di 54 aña, a indiká ku ayera dos di su kolaboradornan a keda detené na momento ku nan a sali bai kumpra kuminda serka di nan komando di kampaña, den Caracas.
“Awe dos hóben ku ta trahando den e sede aki den e aktividatnan di kampaña a sali bai kumpra algu pa kome djis serka i nan a keda interseptá… detené i hibá El Helicoide”, ku ta un prizòn di servisio di inteligensia den Caracas. Organisashon di derechinan humano a kalifiká El Helicoide komo “sentro di tortura”. E dos nobenanan, Gabriel Gonzalez i Javier Cisneros “a keda akusá di instigashon i odio”. Nan tabata forma parti dje ekipo dje kandidato Edmundo Gonzalez den un aktividat na La Guaira.
Machado, faborito den enkuestanan pero prohibí via Korte pa ta kandidata, a nominá e diplomátiko Edmundo Gonzalez Urrutia komo su sustituto pa enfrentá Maduro.
Oposishon a bin ta denunsiá “persekushon polítiko” di su dirigente i militantenan ku a inkluí, ademas, seramentu i multa na hotèl i restorantnan ku a duna servisio na Maduro i su ekipo.
