Strea Briante di nos deporte

WILLEMSTAD.- Xiomara de Lanooy, mihó konosí komo Mara, a nase dia 22 di yüli 1951 na Kòrsou. El a praktiká e deporte di sòftbòl. E ta pupilo di e gran manager Sam Buntin. Su posishon na komienso tabata segunda base i despues shòrtstòp estelar di su ekipo Rising Trotters.

Mara su karera komo sòftbolista a kuminsá na aña 1962, tempu ku e tabatin 12 aña di edat den e ekipo Rising Trotters, bou di direkshon di e gran manager Sam Buntin. Mara a kuminsá regularmente komo segunda base di Rising Trotters. Den e promé kampionato di sòftbòl ofisial di dama na aña 1967, Mara a kaba ku un averahe bateo di .427 i e kampionato siguiente el a kaba ku un promedio di bateo di .500. Mara tabata wòrdu hopi balorá dor di su kompañeronan di ekipo, no solamente dor di su bon prestashon sino tambe dor di e interes grandi ku semper e tabata hunga kuné. E tabata un inspirashon pa su kompañeronan di ekipo.

Mara a yega di bandoná Rising Trotters pa 1 aña i afiliá su mes na e ekipo di Malta Amstel. Despues di un aña Mara a bolbe bèk su klup bieu Rising Trotters komo hungadó estelar komo shòrtstòp i ala bes kuarto bate. E super strea Mara a hunga sòftbòl na Sint Maarten tambe den e ekipo CMB.

Mara a sali kampion bate, ‘homerun queen’ i MVP di kampionato 1973.

Selekshon Antia:

Mara a figurá durante di vários aña den selekshonnan di Antia, manera tabata e kaso den 1971, 1973, 1974, 1976 i 1978 den diferente kampionato i torneo Internashonal. Na aña 1974 Mara a konektá ‘homerun’ den wega kontra Virgin lslands den Kampionato CAC na Santo Domingo.

Logronan personal:

- 1969 Medaya di Noticiero Deportivo Shell, ku don Hector A. Rosario, komo un di e 5 mihó deportistanan di aña.

- 1973 Kampion bate ku averahe 563 (32-18), Homerun Queen ku 5 homerun i MVP di Kampionato AA di Sòftbòl di Kòrsou.

- 1976 di 2 lugá bateo averahe 345 (29-10) i di 2 lugá den homerun konektá, Kampionato CAC na El Salvador.

- 1976 Lider tripel (2) i lider doblete (2), Kampionato CAC na El Salvador.

 Superstars di Rising Trotters: Yolanda Wespel, Mara De Lanooy, Lala Sambo, Chiki Privania.

Logronan ku ekipo:

- 1970, 1972, 1973, 1974, 1975 Kampion di Kòrsou ku Rising Trotters.

- 1970, 1971, 1973, 1975 Kampion di Antia ku Rising Trotters.

- 1973 Ganadó Statuutbeker ku Rising Trotters.

- 1975 Kampion Torneo Softbolclub Cardenales.

- 1975, 1976, 1977, 1978 Kampion Stimulans Toernooi.

Ku Selekshon Antia:

- 1971 Kampion invikto i medaya di oro ku selekshon Antia den promé Torneo di CONCACAS na Puerto Rico.

- 1973 Medaya di plata ku selekshon di Antia na Venezuela.

- 1974 Medaya di bròns ku selekshon na Weganan CAC na Santo Domingo.

- 1976 Medaya di oro na Weganan CAC na El Salvador.

Lugánan ku el a bai ku Rising Trotters i selekshon: Venezuela, Puerto Rico, Santo Domingo, El Salvador i Aruba.

Fuera di tabata hungadó, Mara a coach e tim hubenil di Rising Trotters. Na aña 1989 Mara, Swinda Martha, Vivian Clara i Romouldo Martis a duna instrukshon i training den Montaña i bisindario.

E kampionnan Rising Trotters ku Sam Buntin na kabes den añanan 70.