ORANJESTAD.- For di Aruba a drenta e informashon ku algu promé ku 4’or di mardugá a drenta informashon na sentral di polis ku lo tin algun persona den un vèn blanku ta bahando gran kantidat di vürwèrk na un kas den Grenadaweg.

E reakshon rápido di e patruya di Oranjestad a pone ku di bèrdat a bai topa ku e vèn blanku ku yen artíkulo probablemente prosedente di ladronisia. A resultá ku nan tabata hinkando artíkulonan den un apartamentu na Grenadaweg. Durante listramentu ku a sigui a bin haña un kantidat konsiderabel di vürwèrk, flatscreens, pañanan ku nan etikèt ainda na nan i tambe mas artíkulo elektróniko probablemente tur ta prosedente di ladronisia. Durante listramentu polisnan a konstatá tambe un gran kantidat di mata di mariwana pafó di un kas den St. Vincentweg. konhuntamente ku fiscal, Recherche Oranjestad, departamento di Krímen Organisá i polisnan di diferente otro distrito a tene e razia den e apartamentunan na Grenadaweg i e kas na St. Vincentweg.

En total 4 persona a keda detené i no ta deskartá e posibilidat ku mas detenshon lo bai kai. E vèn ta di un kompania situá na Caya Solo kaminda tambe a disidí di bai listra i einan a bin topa ku kantidat di mas artíkulo probablemente prosedente di ladronisia. Outoridatnan a konfiská tur kos.