WILLEMSTAD.- Durante wikènt ku ta tras di lomba 120 sineasta a kore rònt Kòrsou pa traha un pelíkula kòrtiku den solamente 48 ora.
Nan ta hasi esaki den kuadro di ‘48 Hour Film Project Curaçao’, un festival i kompetensia lokal, ku ta garantisá 'screening' di e pelíkula kòrtiku ganadó lokal na un festival di sine internashonal.
12 tim ta kompetí ku otro pa traha e mihó pelíkula kòrtiku di Kòrsou ku por bai representá Kòrsou otro aña na e rònt internashonal, Filmapalooza, na Rotterdam, Hulanda. Un hurado di profeshonalnan lokal lo anunsiá e ganadó lokal mañan, djárason 9 di òktober, durante e 'award show' despues di e 'screening' na Cinemark, sala XD.
Tayernan di profeshonalnan pa sineasta lokal
Huntu ku e proyekto di Boneiru ku tin e proyekto pa di 3 bia i e proyekto di Aruba, kaminda pa promé bia e proyekto lo keda organisá, e aña aki a ofresé tayernan e simannan ku a pasá pa tur partisipantenan por prepará pa e festival.
Profeshonalnan Dolph van Stapele, sinematógrafo di entre otro 'Tula, the Revolt', bibá na Kòrsou i Adriano NaNof, un ‘sound designer’ ku hopi aña di eksperensia bibá na Aruba a duna workshop na tur tres isla pa asina duna partisipantenan tepnan balioso pa por maksimalisá nan kalidat riba terenonan di diseño di zonido i sinematografia durante e 48 oranan.
Ámbos Van Stapele i NaNof a indiká ku ta sumamente difísil pa traha un pelíkula kòrtiku den solamente 48 ora i a pone hopi énfasis riba zonido, ku hopi bia no ta haña e atenshon meresí.
Tur dos e profeshonalnan a yega di partisipá den e festival i kompetensia den pasado i konosé e lucha pa traha un produkto final den forma di un pelíkula kòrtiku den solamente 48 ora.
‘48 Hour Film Project’ den Reino
Ku e konosementu nobo e proyektonan na Aruba, Boneiru i Kòrsou ta spera di kontribuí na mas pelíkulanan kòrtiku Karibense di bon kalidat i ku opshon pa timnan skohe pa e idioma lokal, mas pelíkula kòrtiku na Papiamentu i Papiamento tambe.
E aña aki ta un aña spesial den Reino pa 48 Hour Film Project. Aruba a kuminsá ku e proyekto, Sint Eustatius tambe lo por manda un pelíkula ganadó lokal aden komo independiente.
Ademas e festival internashonal, Filmapalooza, kaminda ganadónan di mas ku 110 lugá rònt mundu ta sigui kompetí pa premionan i oportunidatnan grandi, ta tuma lugá otro aña na Rotterdam, Hulanda, pa promé bia. E tòp 12 na Rotterdam tin entre otro e oportunidat pa nan pelíkula kòrtiku bai Cannes Film Festival.
Oportunidat pa wak
Mañan djárason, 9 di òktober lo tin e oportunidat pa wak e pelíkulanan kòrtiku na Cinemark.
Aña pasá ku 11 tim e sala XD di Cinemark tabata 'sold out' 1 dia promé ku e evento kaba. Pa esun ku ke sigurá su mes di un karchi, informashon ta optenibel riba e página di Facebook Page di e proyekto: https://www.facebook.com/48HFPCURACAO . Timnan ku ta partisipá tambe lo tin un kantidat di karchi limitá ku nan por bende. Pa informashon general di e proyekto por wak https://www.48hourfilm.com/curacao . Un danki spesial pa hasi e proyekto aki posibel ta bai na Mediaschool Curaçao i Prins Bernhard Cultuurfonds Caribisch Gebied. Tambe un danki na Lovers, Grand Cafe Mahaai, Cinemark, Acoya, Avidi i Blackjack, pa a kontribuí di diferente manera na e proyekto.