NEW YORK, AP.- Seis estado i Distrito di Columbia a demandá Departamento di Agrikultura di Merka, bisando ku esaki a debilitá a standart nutrishonal di desayuno i lùnch na skol dor di hasi e rekerimentunan pa salú mas fleksibel aña pasá.
E demanda, presentá den un korte federal na Manhattan ta pidi hues pa anulá e kambionan, ku segun e estadonan a wòrdu implementá di forma arbitrario i kaprichoso.
E gobièrnu a “debilitá” e standartnan nutrishonal “signifikativamente” pa sodio i grano integral sin duna e públiko oportunidat pa komentá riba e proposishon, konforme e demanda.
E estadonan i e distrito kapitalino a bisa ku e standartnan mester wòrdu basá riba e rekomendashonnan Dietiko di gobièrnu federal, Akademia Nashonal di Siensia i estudionan sientífiko tokante nutrishon di mucha.
E programa ta ofresé desayuno i almuerso grátis òf pa un preis barata na skolnan públiko i otro institushonnan. Aña pasá esaki a duna servisio na 30 mion mucha.
E fiskal general di New York Letitua James kende ta enkabesá e demanda legal a bisa den un nota di prensa ku diariamente tin mas di un mion mucha na New York ku ta dependé di e kumindanan aki.
