WILLEMSTAD.- Mañan anochi Fundashon JAG ta presentá un tremendo konsierto pa hasi apertura di ‘Carnival Village 2020’.
E konsierto ku lo konta ku presentashon di artistanan lokal i internashonal su meta ta pa rekoudá fondo pa por yuda gruponan di Karnaval ku mester di sosten pa nan por sigui desaroyá.
Juni Aniceta, presidente di JAG a indiká ku riba e anochi aki Kòrsou lo por disfrutá di 6 konsierto riba 1 tarima, esaki ta nifiká ku kada artista òf banda ku presentá lo duna un konsierto pa e públiko, pues nada di presentá 2 òf 3 piesa i djei baha bai.
E artistanan lokal ku lo presentá ta e banda ONE Flavaz ku nos Rei di Tumba 2019, Dibo Doran; Gentz, e popular agrupashon musikal ku den temporada di Karnaval ta garantia pa bon ambiente i artistanan Dongo i Ir-Sais ku ta sali Aruba i a primintí di bin presentá tur su éksitonan riba e anochi aki.
Kevin Lyttle i e grupo Krosfyah ku Edwin Yearwood for di Barbados lo ta e artistanan internashonal ku lo presentá. Tantu Kevin Lyttle komo Krosfyah ta konosí pa e tremendo ambiente ku nan ta forma.
Karchi pa e konsierto den ‘Carnival Village’ ta optenibel na rason di 55 florin na Mensing’s Caminada, 24 uur uit de muur i na tur Pagafasil di ‘Tu y Yo’.