WILLEMSTAD.- Ayera tardi a tuma lugá e inskripshon pa Kantadó Mayo 2019. E festival di músika di Seú ku tin komo meta pa skohe e ‘Kantadó Mayo’ pa selebrá e fiesta di Seú lo konosé 80 komposishon nobo ku lo keda kompaña pa 27 agrupashon rítmiko.
Di e 80 inskripshon tin 2 kantante ku ainda mester haña un agrupashon rítmiko pa kompaña nan.
Sinku ‘Kantadó Mayo’ di pasado, Marilou Djaoen Boeldak, Reinier Lijfrock, Jarnice Aitatus, Rumichel Marchena i e Kantadó Mayo saliente, Furgell Wijngaarden a inskribí pa kompetí den e festival.
Último fecha pa entrega di letra ta djaweps awor, 14 di mart 2019. Entrega di letra mester sosodé via e email: komishon.kantado.mayo@gmail.com
Djaweps awor, 7’or di anochi lo saka e órden di aparishon pa e fechanan preliminar di Kantadó Mayo ku ta: 25, 26 i 27 di mart 2019. Final di Kantadó Mayo ta tuma lugá dia 29 di mart 2019. Riba foto nos por apresiá e ambiente ku tabatin na inskripshon di Kantadó Mayo 2019.