WILLEMSTAD.- Tur kos ta kla pa djadumingu awor presentá e tremendo show ‘A 100% Christmas’ ku ta un show komo antesala pa e sertámen di Miss Universe 2018 kaminda Marvia Laurence un hóben ‘Missiologo’ lo entretené e públiko pa asina por disfrutá di un anochi fantástiko.
E anochi ta kuminsá ku un tremendo show di moda kaminda bo tin e oportunidat di mira Divanan ku 20 aña pasá tabata kousa estrago den e mundu di moda i beyesa enkabesá pa Rucille Salazar, ku ta un dje mihó animadónan ‘ten di su ten’, kompaña pa Tito Doran.
Divanan ku lo dominá e pasarela riba e anochi aki lo ta: Lynette Kelly, Tonisha de Sousa, Gaylen Martie, Maruzela Daou, Tessa Thijm, Valerie Brown, Charifa Janga, Sue Ann Thuus, Ayanette Statia, Jozainne Wall, Fatima Sintjago, Chantal Rumay Jardim, Lynette Winkel, Scarlet Zalm de Groot, Shirley Fereira, Diandra Peiliker i Sherry Alberto.
E show ta start atardi ku e chikitinnan i hóbennan ku lo desfilá trahenan i tambe lo tin un homenahe na personahenan den e mundu di moda. Parti atardi e públiko lo gosa di un tremendo ‘Wine & Cheese’ kortesia di IBFF i na momentu ku e show kaba, TDS lo repartí un pasaboka i ko’i bebe pa asina tur hende prepará pa mira e sertámen di Miss Universe.
Karchinan pa ‘A 100% Christmas’ ta optenibel na Renaissance i djis promé ku e evento na porta.