WILLEMSTAD.- Djasabra último a tuma lugá un reunion entre Kas di Kultura, representantenan di departamento di pèrmit di Kuerpo Polisial i lidernan di gruponan di tambú. ‘DEN E BEMBE’ a sostené un entrevista ku Sra. Emly Fransisca, direktor di Kas di Kultura kende a indiká ku e reunion a bai hopi bon i ku a definí 12 punto di atenshon ku durante dje siman aki lo keda atendé huntu ku Polis pa despues yama e lidernan di grupo bèk pa un reunion. Durante dje reunion a atendé reklamonan ku a bin dilanti, a atendé e situashon di pèrmitnan ku a wòrdu ningá i kondishonnan èkstra ku ta pone pa por risibí un pèrmit. Entre e puntonan di atenshon tin tambe e aporte ku Kas di Kultura lo mester duna. Puntonan manera e gastunan finansiero relashoná ku presentashon di un grupo, seguridat i tambe material manera dranghek i e pregunta dikon no tin mas Polis riba kaya, tambe a forma parti dje reunion. E remarkenan ei a pone ku a yega na 12 punto spesífiko pa traha riba dje i pa den e siman aki mes tin un posibel solushon. Sra. Francisca, a lamentá ku e puntonan aki ta na diskushon hopi lat den aña. ‘Lo tabata mihó si nan tabata puntonan di atenshon ku lo a keda atendé delantá. E suseso di ‘Strak Strak Barbershop’ a lanta un inkietut serio. E echo ku a bini kambio den mando di departamento di pèrmit na Polis a pone ku no por a traha di forma diligente manera ta e deseo’. Mas aleu Sra. Francisca a bisa ku: ‘E asuntu di drangheknan ta algu ku a wòrdu algu ku a wòrdu agregá despues i e kantidat di bewakernan a subi pa por haña pèrmit, loke ta a hisa e gastunan’. Pa presentashon di gruponan ta e establesimentu ta pidi pèrmit, pero ta laga e gruponan hasi e trámitenan nesesario. Sierto di e gastunan e gruponan mes ta kargá, loke ta pone ku e montante di pago pa presentashon ta abou. Sra. Francisca a sigui splika ku gruponan no ta haña praktikamente nada for di nan presentashon. Ta puru for di nan afinidat hopi profundo ku eksistensia di tambú nan ta presentá. Sra. Francisca a indiká ku e presentashon di Grupo di Tambú no ta un negoshi lukrativo, ta entre 350 florin pa 400 florin. ‘Ta djis pasó nan tin hopi amor pa tambú nan ta hasi e trabou. ‘Den esei nos komo Kas di Kultura tin un trabou basta serio pa fasilitá e totalidat pa e trabou ku nan ta hasi’, Sra. Francisca a terminá bisando. Pa ‘DEN E BEMBE’ ta di lamentá ku di bèrdat nos ta praktikamente na final di 2017 i ta awor tei atendé e puntonan aki. Ban spera ku ta logra na yega na akuerdonan pa dje forma ei sigurá ku sobra presentashonnan di e temporada aki di tambú por tuma lugá sin problema.