ORANJESTAD. - Via di Ministerio Publico na Aruba, nos a haya informacion cu autoridad na Aruba a detene un Hulandes di 66 aña siman pasa, dia 24 di januari ultimo, relaciona cu un investiacion cu FIOD y Polis ta haciendo relaciona cu un caso grandi di labamento di placa, fraude di impuesto, falsificacion di firma, y solicitud di beneficio usando documento falsifica.

E sospechoso a keda entrega diadomingo ultimo na Hulanda. A pone beslag riba un miyon euro mientrastanto entre Aruba como na Hulanda.

E Hulandes di 66 aña ta propietario di un compleho di apartamento na Aruba. Banda di esey, e ta doño di un cas na Hulanda, y ambos (tanto e apartamentonan y e cas ta gehuurd).

A compronde cu e sospechoso tabata biba den un di e apartamentonan.

E sospecho ta cu e bienes a wordo cumpra cu fondo adkeri di fondo criminal y cu asina tabata 'laba' e placa aki adkeri ilegalmente.

Banda di esey ta sospecha e persona di a comete fraude di impuesto y a haci peticion pa un beneficio (uitkering) usando salarisslip falso.

Na 1994 e sospechoso a wordo sentencia caba pa traficacion di droga. E tempo ey el a haya un castigo di 2 aña y mei y un boet.

Polis na Aruba, FIOT (FIOD Arubano) y Ministerio Publico a haci un entrada hudicial na un compleho di apartamento dia 24 di januari, unda cu a pone man riba e administracion y tambe placa di huur y bienes.

E sospechoso a keda deteni den su apartamento y Husticia di Hulanda a pidi autoridad di Aruba pa extradit’e pa Hulanda, loke cu autoridadnan local a cumpli cu nan tambe.  .

E investigacion penal ta wordo ehecuta pa un asina yama 'CombiTeam'. Esey ta un cooperacion di Polis y FIOD. E CombiTeam ta dirigi riba e combinacion di crimen organisa y labamento di placa pa medio di structura financiero.

P’e labamento di placa, tin mester di facilitadornan, manera servicio financiero y oficina di trust. Ta papia tambe di courier di placa of un asina yama 'stroman'.

Ta trata di criminalidad cu ta atacha integridad di e mundo baho di criminalidad y esun normal. Ta masha placa ta envolvi den henter e proceso aki.