WILLEMSTAD.- Den un komunikado ekstenso, F.F.K. ta referí na situashon ku selekshon nashonal a haña su mes aden na Guatemala. Un situashon ku a pone ku mester a tuma kontakto ku e representante di CONCACAF ku tabata presente den nòmber di FIFA, pa plantia disgustu di Kòrsou riba algun desishon ku a keda tumá.
F.F.K. ta trese dilanti ku, pa kuminsá, ora a yega aeropuerto di Guatemala a resultá ku tabatin situashon ku no tabata kumpli ku protokòl di FIFA pa ku COVID i transportashon di hungadó i e staf di nos selekshon nashonal.
Finalmente a yega hotèl i einan Cuba huntu ku representante di Guatemala a pone na konosementu di Kòrsou ku nan a stipulá orario di entrenamentu pa Kòrsou i esaki tabata den konsulta ku e ‘match commissioner’ sin ku Kòrsou tabata involukrá. No a respetá e orario ku a wòrdu konfirmá promé ku Kòrsou a biaha pa Guatemala i a krea un situashon kaminda nos selekshon lo no por train mas segun orarionan stipulá.
Basá riba e informashon aki, a start un diskushon inmediatamente pa logra e mihó posibel pa e team di Kòrsou. Tambe a sali na kla ku Kòrsou no tabatin oportunidat pa train na e orario di wega, un dia promé ku e partido den e stadion unda e wega ta keda efektuá. A resultá ku nan a hür e stadion ku federashon di atletismo dje pais. Pa Kòrsou esaki a keda interpretá komo intento pa fòrsa nos delegashon un ‘fastball’.
Kòrsou no a aseptá esaki i a start un diskushon ku e representashon di FIFA komo tambe e ‘match commissioner’. E diskushon i deliberashon a dura te mardugá i a kontinuá su siguiente mainta. Ku aprobashon di Guus Hiddink a aseptá pa train djasabra na mes un ora ku e wega mester hunga djadumingu, pero riba un otro tereno di mesun kalidat.
F.F.K. ta trese dilanti ku tantu Guatemala, Cuba, i e ‘match commissioner’ a komprondé dje forma skèrpi ku a sali na defensa di nos selekshon, ku FFK ta bon informá di e reglanan di FIFA i ku FFK lo eksihí semper lo máksimo pa nos selekshon.
Finalmente e wega a tuma lugá i Kòrsou a gana ku skor di 2-1. Ayera mardugá e delegashon a regresá, i miéntras tantu, e hungadónan a sigui pa Oropa pa reanudá e kompromiso ku nan respektivo ekipo.