WILLEMSTAD.- E di dos kaso di likidashon a kai ayera mainta tempran, ora deskonosínan a para warda un hòmber yega kas i pa basha bala riba dje. E no a skapa i a fayesé. Por papia di un akto di likidashon si mira kon e tiroteo a bai. Polis ta informá ku djárason 25 di yanüari alrededor di 07.40’or, sentral di polis a risibí yamada di un kaso di tiramentu ku a tuma lugá riba Providenciaweg, Buena Vista.

Na yegada di e unidat polisial, nan a bin topa un hòmber drumí abou ku diferente herida di bala na su kurpa i ku no tabata duna señal di bida den kurá di un kompleho di apartamento. For di investigashon preliminar a sali na kla, ku un hòmber a kaba di yega na e sitio i na momentu ku e tabata sintá den su outo, el a keda sorprendé pa dos persona ku a lòs algun tiru dirigí riba dje.

E víktima na momentu di e tiramentu a baha for di e outo, i kore drenta den kurá di e kompleho di apartamento. E dos personanan aki a sigui tras di e víktima i keda lòs tiru dirigí riba dje. Probablemente patras den kurá di e kompleho di apartamento, e víktima a bin kai abou, kaminda polis a bin hañ’é.

Dòkter di polis a presentá na e sitio i konstatá morto di Francisco Zabala-Chirino nasé na Venezuela dia 6 di sèptèmber 1987. Riba òrdu di fiskal di Ministerio Públiko a konfiská e kurpa pa mas investigashon.

Hopi ta e rumornan ku tin ku e víktima Zabala-Chirino lo tin algu di aber ku e asesinato di den Saliña dje rapper. Pero nada ta konfirmá ofisialmente pa outoridatnan polisial.