WILLEMSTAD.- Un grupo grandi di 17 tenista hubenil di Kòrsou, 2 di Aruba i 1 di Boneiru ta forma parti di un asina yamá ABC Travel Team 2018 ku próksimamente lo start un seri di kompromiso internashonal. Meta ta pa e hóbennan haña eksperensia di hunga den torneo grandi, tambe pa nan por desaroyá mas aleu den e deporte i pa por traha ku otro den ekipo.

Ku bista riba e gira a bin ta organisá aktividatnan pa rekoudá fondo, manera tabata e kaso dia 12 di mei último na Mambo beach. E siguiente aktividat ta 27 di mei ku un Rallyton na RCC i pa kua nan ta spera koperashon di tantu empresanan komo personanan individual ku por spònser e hungadónan.

Pa loke ta trata e biahe dje tenistanan, esaki ta start 22 di yüni ora ku un grupo sali pa Aruba, otro pa Bahamas i e sobrá pa Orlando. Di 22 pa 28 di yüni lo tin un torneo TIHTA na Aruba, na Bahamas di 29 di yüni pa 7 di yüli lo ta Junkanoo Bowl. Ta sigui 7 pa 9 di yüli na Orlando i 14 pa 16 di yüli un torneo na Miami.

Un invitashon ta bai na un i tur pa koperá ku e hóbennan pa nan por hasi e gira.