WILLEMSTAD.- Trabounan di preparashon serio ta tumando lugá den e bario di Muizenberg
kaminda abitantenan bou di liderazgo di sr. Simon Rafaela "Pietje" i sra. Melitza Daal a logra haña koperashon di Betonenfabriek Brievengat pa traha otro plenchi bunita bou di e palu di mangonan grandi den Sportlaan kaminda gran parti di e aktividatnan lo tuma lugá.
Abo tabata sa ku kada kas den en bario di Muizenberg tin un òf mas palu grandi di mango ku ta karga fruta na granèl?. E bario aki tambe tin su baluartenan ta p’esei sra. Daal i sr. Rafaela kier a invitá barionan ruman pa bin selebrá ku nan djadumingu próksimo Dia di Bandera.
Muizenberg na final di aña 40 a keda kombertí den un pueblesito (un di esnan mas bon organisá) kaminda ántes nan tabata konosí solamente pa un área ku tur e kampamentunan ku CPIM a krea. Lo bo kòrda e kampamentu chines kaminda a matansa kruel di aprel a tuma lugá mas na banda pariba Kampamentu di Merikano, i na otro bandanan pabou e kampamentunan vários di loke nos konosé komo Suffisant( kampamentu di Sürnam , Venezolano , kampamentu di karibensenan di abla ingles etc.)
Abo lo por pone bo mes na altura di tur e detayenan aki ora bo bin djadumingu awor ya ku ta bai tin kaminata bou di guia den e bario inkluso tur den troli ku guia di bario kontando e bunita historia di Muizenberg. Será konosí tambe ku e baluartenan ku e bario aki a produsí, e bon yunan di Kòrsou ku a saka nos kara.
Lo ta bai tin un programa hopi animá despues ku den forma sinkronisá ta hisa bandera 12’or ku músika di kai òrgel Mack, músika di DJ, presentashon di grupo di bailenan di Colombia, tambe e grupo di baile Baliña, inkluso presentashon di Sablika, Grupo Kòmpèr i AQ band. Vários wega manera dominó pa nos hendenan partisipá i sufisiente stènt ku kos di bebe i un variedat di kuminda pa deleitá bo paladar.
Djadumingu awor pone Muizenberg riba bo ruta pa bishitá i selebrá ku rumannan
di Muizenberg e dia importante aki di Union Nashonal.