TARZANA, USA (AFP).- Abogado di dia, kantante anochi. Asina por definí e rutina nobo di Mariel Coló Miró, e abogado ku entre su klientenan ta konta ku e poderoso narkotrafikante mehikano Joaquin “El Chapo” Guzmán, i kende a skohe pa hasi un karera pafó di tribunalnan.
E puertorikeño di 31 aña, ku tambe a aktua den defensa dje magnate akusá di tráfiko seksual di menornan Jefrey Epstein, ta buska pa start un karera den e merkado difísil di músika tradishonal mehikano bou dje seudónimo di “La Abogada”.
Ounke pa hopi hende ta parse di ta un kombinashon ku no por kana huntu, pa Colón e tribunalnan i e esenario ta parse otro… i hopi.
“Bo tin un oudiensia ku ta e hues i e hurado, i bo mester konvensé nan di un historia”, el a splika den un entrevista na AFP promé di un presentashon den un klup nokturno di Los Angeles, California.
Otro punto komun? “tur dos ta mundunan ku na kabes hende hòmber”, segun e mes ta bisa. Pa Colón Miro, karismátiko i sonriente, e industria di entretenimentu i Mexico tabata su dos pashonnan grandi for di mucha, pero e opseshon di su mayornan “pa un stabilidat ekonómiko” a push’é pa bai skol di lei na New York.
“M’a bin ripará ku realmente esei tambe ta un manera pa presentá bo mes”, el a bisa. I den loke ta parse algu di destino, su promé kaso tabata esun di “El Chapo” Guzmán. “Esei a habri hopi porta p’ami”, segun el a duna di konosé.
