WILLEMSTAD.- Ku suma plaser direktiva di AGKK a tuma nota ku 10 di ougùstùs último ku e lei pa duna eksonerashon di impuesto di importashon i omzetbelasting ora ta trata di artíkulonan pa deporte, enseñansa i kultura, a keda aprobá den Parlamento.
For di aña 2005 AGKK a bin ta manda diferente karta ku firma di gruponan di Karnaval pa ministernan di finansa ku e petishon pa nos gruponan di Karnaval por risibí eksonerashon di impuesto di importashon riba artíkulonan pa Karnaval.
Durante di e temporada di Karnaval, hopi di nos artistanan lokal ta haña e oportunidat pa ekspresá nan mes kreativamente. E kreatividat aki ta fundeshi pa kada un di nan por desaroyá den arte i kultura.
Ora papia di arte i kultura, ta papia di e hende. Arte ta manifestashon artístiko di konsenshi sosial. E temporada aki ta esun ku mas nos komo pueblo ta uni i koperá ku otro. Un konglomerashon di hopi hende konsistiendo di diferente nashon, edukashon, edat, sekso ta disfrutá di un kantidat di aktividat organisá pa diferente instansia. Nos tur ta konsiente ku Karnaval di Kòrsou ta un di e selebrashonnan kultural di mas grandi di nos pueblo i básikamente ta generá entrada i trabou i alabes desaroyá i promové arte, kultura i ekonomia. Esaki tambe ta forma parti di un maneho pa kombatí pobresa.
Un lei pa duna eksonerashon di impuesto i omzetbelasting pa artíkulonan di Karnaval, finansieramente lo yuda nos gruponan di Karnaval pa engrandesé i promové Kòrsou su Karnaval komo un produkto turístiko. Esaki ta hasi nos dushi isla Kòrsou mas atraktivo pa turista i alabes e balor inmenso di relashon kultural pa por proyektá kultura di nos pais den eksterior.
Durante e siman aki direktiva di AGKK lo dirigí un karta na nos minister di finansa, señor Kenneth Gijsbertha pa por risibí mas detaye pa loke ta trata e lei aki i tambe ki dia e ta drenta na vigor, debí ku ya kaba diferente grupo di Karnaval a kuminsá ku preparashonnan pa ku selebrashon di Karnaval 2018.