WILLEMSTAD.- Nos a keda informá pa propio Axel Pikero ku maneho di De Heeren a keda asina enkantá ku e agrupashon su ambiente i públiko ku nan ta atraé. Esaki a duna resultado ku maneho di De Heeren a sera un akuerdo ku agrupashon Dreams pa bira e "house band" riba tur djaweps anochi.
Un i tur por kòrda tradishonnan super eksitoso ku agrupashon Dreams tabata tin den pasado manera Lounge Of Dreams den club Bananas, pues nos tin sigur ku De Heeren tambe lo bira e "place to be" riba djaweps anochi.
Mas aleu Axel a informá nos ku e konsepto di Dreams ku ménos músiko ya kaba ta dunando su frutanan mirando e kantidat di pedidonan ku a drenta nan agènda. E preis ta mas pagabel i masha hopi petishon a drenta pa fiestanan di kas i kasamentu. Pa lokual ta trata bookings por yama +59995120227 òf mail na dreamscuracao@gmail.com
Pues nos por konkluí ku loke ta sigur e lastu lunanan di aña Dreams ta kayente.