WILLEMSTAD.- Dia  4 di mei 2014 algun integrante klave di Simplemente Perfecta a disidí ku nan ku bai lanta propio agrupashon musikal.
Lionel (Johnny Brion) Ephril (Jackson) Ramada, Lionel (Nel) Clemencia, Norvel (Nonchi Campana) Sommer huntu ku manager e tempu ei Toto Gerard i Oswin Ortela i otro integrantenan manera Ompi Stefania, Sherman Aniceta, Celsio Pieters, Ramsy Siliee, Papi Uraní, Yuyu Djaoen, Curtney Jacobs i Arion Helena a lanta Sabor Original (SO) i te ku e dia di awe nan ta huntu. Despues di 2 aña Carlos Sambre tambe a djòin e banda i pa un tempu kòrtiku e kantante femenino Anairia Nivilac tambe a forma parti dje banda.
Agrupashon SO ketu bai ta bou di maneho di Oswin (Palo) Ortela, kende tin un Amor inmenso pa e banda komo un fiel baidó di kòmbèk.
Den e tim di maneho diario dje banda e ta konta ku Raymond (Gran Cat) Cathalina, Robert (Sapatu) Girigorie i tambe Shannon Isabella komo nan Roadmanager.
No opstante e temporada difísil ku farándula ta pasando aden, e banda a sa di mantené su kabes riba awa. E banda praktikamente tur siman ta tin toká i su kansionnan tabata hopi zoná, bailá i solisitá. Na diferente okashon nan a pega Hitnan ku a pega duru tantu na Kòrsou, Boneiru i Hulanda manera entre otro Amigu Pa semper, Maestro…………..

Logro i plannan di S.O.
Un di e logronan grandi di e banda aki tabata e presentashon durante di un siman riba e barku Krusero Pullmantur kaminda nan tabata sa di buta masha bon ambiente ora ku e banda tabata toka den oranan di atardi riba dèk rondó di pisina i tambe anochi den diskoteka.
Turistanan tabata bira loko ku e músika di e banda. Na diferente okashon e banda a sa di yena salanan yen na Ulanda. Un di e logronan grandi ta e echo ku den luna di òktober  próksimo e banda lo ta den un tour di 12 dia pa Spaña kompañá pa alrededor di 200 fanátiko di Ulanda i di Kòrsou.

Selebrashon 4 aña rumbo pa promé lustro
E selebrashon di 4 aña SO ta bai den chikí ku un fiesta baliabel bolo i trit pa fanátikonan, pero den dje ta ranka sali grandi ku un Mega kampaña rumbo pa 5 aña.
Nos ta bisa Mega Kampaña pasobra ta promé biaha den historia den mundu di kòmbèk un banda ta organisá un kampaña kaminda fanátikonan tin oportunidat di gana un outo 0 km.
Despues di a sinta pensa kon tei selebrá e 5 aña dje banda i hasi algu pa yuda farándula lanta kabes, unánimemente direktiva a bai di akuerdo pa hasi e regalo grandi aki na bailadores.
Huntu ku e gran premio aki ku ta e outo Voleex C 30 di Star Motors lo bai tin tur luna rifa di diferente premio interesante den fiestanan organisá pa SO . Un dje premionan ku lo por gana tur luna ta un ‘Gift Certificate’ di Mister & Miss Exclusive durante di henter e aña aki i komienso di otro aña, danki na e diferente patrosinadornan ku ta dunando nan kontribushon.
Tambe e banda ta konta ku apoyo di fanátiko i organisadónan ku ta konsiente ku nos mester hasi algu pa ‘boost’ farándula.

Kampaña pa gana outo
Pa partisipá na e kampaña aki ta masha fásil.
Djis fanátikonan mester bishitá fiestanan organisá pa S.O. i naturalmente fiestanan organisá pa e organisadónan ku ta kontribuí ku e kampaña. Esaki lo keda anunsiá den propaganda i riba ‘flyers’ nan.
Ora ku bo paga pa bo karchi, na entrada bo ta risibí un kupòn i e kupòn aki bo ta yena i tira den buzon. No nesesariamente bo mester tire e anochi ei mes.
Otro aña dia 4 di Mei 2019 un notario lo supervisá i saka e ganador dje outo Voleex C30.
Un di e reglanan importante ta ku e ganador di e outo mester tuma su premio e anochi aki i si e no tei presente, lo warda un ora i si despues di un ora e no yega, lo saka un otro ganador.
Ya for di den e fiesta di selebrashon 4 aña di S.O. dia 4 di mei próksimo na Because, bailadoresnan ta kuminsá risibí nan kupon pa partisipá.

S.O. mano a mano ku Arnell i Orquesta
Dia 5 di mei próksimo S.O. lo ta den un fiesta baliabel  huntu ku Arnell i Orquesta den friu na Roosevelt Event Center. Bishitando e fiesta aki tambe bo ta risibí bo kupon pa partisipá.