WILLEMSTAD.- Despues di 4 luna di kurso intensivo mester bisa ku tur kos ta kla pa asina e kursistanan duna un tremendo show den WTC su ouditorio.
Akademia ShowBizz ta e Akademia kaminda tantu nos artista internashonal Danny Yanga i dosentenan ta pasa eksperensia na tantu mucha, hóben i hende grandi pa asina krese e parti di nan talento.
Yunan di Kòrsou tin hopi talento, i a yega ora pa engrandesé esaki ku aun mas talentonan nobo i personanan ku tin e interes pa aki un temporada bira parti di Kòrsou su farándula por en general.
Den e kursonan ku a tuma lugá tur djasabra tantu Danny i e dosentenan a duna lès riba e tereno di kanto, baile, aktua i tambe ekspreshon.
Danny Yanga a duna di konosé ku e kursonan aki ta e di 3 edishon i tabata aun mas intensivo i ku bo ta mira rápidamente desaroyo den kada persona ku a partisipá.
Manera ta kustumber ta sera e temporada di kursonan ku un tremendo show kaminda e kursistanan ta demostrá dilanti di un públiko grandi ku ta konsistí di nan famia, amigu i konosínan ku ta bin apoyá nan i tur ku ke mira loke ku nan a siña na Akademia ShowBizz.
E show di e terser edishon di ShowBizz ta titulá "One by One" kaminda nos ta para ketu riba kada un talento i nan propio abilidat i tambe karakter.
Danny Yanga ta garantisá ku tantu e i e mayornan por mira diferensia promé, durante i despues di e kursonan. E show ta bai ta unu kaminda tur e fasetanan di ShowBizz ta bai ta sentral ku un "Allure" pa kita sombré.
Danny ta konosí pa krea shownan na nivel ku tur persona pa tempu largu ta keda sigui komentá. Despues di e kurso Akademia ShowBizz ta sera pa ku temporada di vakashon i dia 13 di ougùstùs 2017 ta ranka sali bek ku e di 4 edishon di Akademia ShowBizz.
Un invitashon na tur persona pa bin wak e show dia 25 próksimo ku e muchanan i despues di show por inskribí e muchanan ku tambe ke partisipá den e show di desèmber.
E shownan di klousurá pa e temporada aki ta tuma lugá dia 25 di yüni na WTC 1'or di mèrdia i 6'or di atardi. Si bo ta interesá pa tuma mas informashon di ShowBizz òf pa kumpra karchi, por yama 521-3700 òf 560-6225.