WILLEMSTAD.- Ku tur probabilidat pa apertura di aña eskolar 2018-19 skolnan di Bándabou lo por hasi uso dje sala multifunshonal na Barber. E kamerin i toiletnan ta praktikamente kla i pa otro luna lo duna inisio na e trabounan pa sera e sala ku blòki.

Ministernan Kenneth Gijsbertha (Finansa) i sra. Marilyn Alcalá-Wallé ayera a keda invitá pa FDDK pa tuma nota di progreso dje trabounan na e sala. Aña pasá gobièrnu di Kòrsou bou signatura di Hensley Koeiman a pone 1.2 mion florin pa por realisá e trabounan pa por finalisá ku e konstrukshon.

Direktor di FDDK, Thakai Doran, a trese dilanti ku seis kontratista a presentá nan oferta pa sera e sala i awor t’asina leu ku pa febrüari e trabou por start. Di parti di Refineria Isla ya a haña sierto material pa e trabou por tuma lugá.

Minister Gijsbertha a mustra e importansia pa realisashon dje sala multifunshonal. “Bándabou ta meresé esaki”, segun e mandatario kende a asentuá ku deporte ta uni pais i p’esei mester traha riba e fasilidatnan.

Di su parti, Minister Alcalá-Wallé a pone atenshon na e aspekto di deporte eskolar komo tambe promoshon di turismo den deporte. Manera ta konosí, skolnan di Bándabou den oranan di mainta lo bai hasi uso dje fasilidat una bes ku esaki ta kla.

Proyekto di 5 mion florin

Andries Delanoi kende ta e persona ku ta guia e proyekto, huntu ku Steve Schmidt, a trese dilanti ku ta for di 2008 a start ku e proyekto, kual tabata inkluí un pista di atletismo i algun otro fasilidat. Pero lamentabel ta ku “semper kosnan pa Bándabou ta keda na mitar i esaki ta un ‘drawback’ pa e pueblo”.

Afortunadamente, awor aki tin fondo pa kaba e proyekto ku 10 aña pasá lo a rekerí un invershon di 4 mion florin. Pero si disidí awor ku tin ku konstruí e pisina tambe aserka, lo mester di un mion adishonal.

Pa e momento aki importante ta pa sera e sala i aki seis pa shete luna e fasilidat lo ta den uzo.

...Parti paden di e kamerinnan ku tin toilet i baño...