WILLEMSTAD.- E obra teatral ‘CancelAir’ ta sigui kosechá éksito ku presentashonnan sala yen. Durante di e fin di siman tras di lomba un biaha mas e obra skibi i dirigí pa Roland ‘Pachi’ Damon a bolbe yena sala.
‘CancelAir’ manera ta konosí a relatá diferente situashon ku e kompania di aviashon InselAir a hañ’e konfrontá kuné na un forma chistoso. E elenko di ‘Pro Arte Kano’ a lusi un biaha mas ku bon presentashon.
Den kombersashon ku ‘DEN E BEMBE’ a hiba ku Pachi Damon el a indiká di ta sumamente satisfecho kon e obra a keda aseptá. ‘Ta un dje obranan ku nos a presentá ku a logra den su salida yena 10 sala ful ful. E obra ta bon komentá bou di komunidat’, asina Pachi a splika.
Aworakí e obra lo bai wòrdu presentá na Aruba den e wikènt di 23 di yüni 2017. Na Ulanda nan tabatin un presentashon kaba riba Dia di Mama, 14 di mei 2017. E siguiente siman despues dje presentashon na Aruba lo sigui ku presentashonnan aki na Kòrsou.
Riba foto nos por apresiá algun esena dje obra ‘CancelAir’.