WILLEMSTAD.- Djasabra anochi a tuma lugá e sertámen di Curaçao Beauty Pageant den sala di eksibishon di WTC. E sertámen mester a saka Kòrsou su representantenan pa partisipá na Miss Universe, Miss World i Miss International.
Fo’i ora e sertámen a kuminsá ya bo por a sigui un sin fin di komentario riba retnan sosial pa loke ta trata entre otro dekorashon di stage, presentashon di partisipantenan, organisashon i asina por sigui menshoná.
Tin un kantidat di pregunta ku lo ta interesante pa tende dje organisashon e motibunan pa kua nan no a duna atenshon na e detayenan aki durante dje produkshon dje sertámen.
Loke pa hopi ta inkomprendibel ta e echo ku a skohe un tema di otro pais pa presentá nos sertámen lokal di beyesa. Por a probechá ku ayudo di Ofisina di Turismo pa skohe algun sitio di Kòrsou kaminda lo por a traha un intro/ apertura dje programa. Biba nos kultura !.
‘DEN E BEMBE’ no ta bai sigui riba sobrá puntonan pasó no ta e intenshon pa traha un relato detayá di kada punto ku e organisashon segun nos lo mester duna splikashon riba dje.

RESULTADO
Tiffany de Freitas Bras ta e promé finalista 2018. Diona Angela a resultá ‘Miss International 2018’, Nazira Colastica lo representá Kòrsou na Miss World 2018 i Akisha Albert a keda koroná komo Miss Universe Curaçao 2018.
Pabien na e damitanan ku a kai den premiashon i Kòrsou por ta orguyoso di tin digno representante pa e tres sertámennan.