WILLEMSTAD.- Nos Miss Universe Curaçao, Akisha Albert ayera a bandoná Kòrsou rumbo pa Thailand. E di 67 edishon di Miss Universe e aña aki ta tuma lugá dia, 17 di desèmber 2018 na Bangkok, Thailand. Pa nos den e hemisferio oksidental, e sertámen lo keda transmití, dia 16 di desèmber 2018 pa 8 or di anochi. Famia i amistatnan a bai despedí di Akisha ayera na aeropuerto i loke a resaltá ta e hóbennan ku ta sufri di ‘Down Syndrome’ ku tambe a yega aeropuerto pa despedí di Akisha. Resientemente Akisha a batisá su promé kalènder ku a keda dediká na personanan ku ‘Down Syndrome’ pa kende Akisha tin un atmirashon spesial. EXTRA ke deseá Akisha tur klase di éksito i ta spera e apoyo total di pueblo di Kòrsou na nos representante den e sertámen di Miss Universe.