WILLEMSTAD.- Tim di maneho di agrupashon musikal Gentz Tre'chic a tuma nota den diferente medio di komunikashon i riba retnan sosial ku tin rumor ta kore ku posiblemente Gentz lo bai disolvé.
“ Nos kier aklará ku na e momentunan aki nos enfoke ta riba nos produkshonnan nobo ku lo sali pronto i riba tur nos kompromisonan ku manera semper nos a i lo sigui kumpli kuné komo Gentz.
Otro siman Gentz lo ta na Aruba ku un fiesta praktikamente ‘sold out’. Siguí pa un presentashon den WTC kompañando T-sean. Den luna di yüni Gentz ta na Ulanda ku tambe ta premirá di bira un fiesta ‘sold out’. Pa luna di yüli Gentz lo bolbe Ulanda pa zomerkarnaval i siguiendo pa luna di ougùstùs kaminda nos lo biaha pa Bèlgika pa 2 presentashon fenomenal na e festival ku mas di 10.000 bishitante kual ta Antilliaanse Feesten na Antwerpen.
Pues apesar di tantu rumor i spekulashon den e mundu farandulero, Gentz ta moviendo ketu bai i nos ta i lo sigui demostrá e vishon ku nos tin. Gentz ta para pa kalidat musikal i profeshonalismo i esaki nos lo sigui brinda pa asin’ei sigui engrandesé, kontribuí i entretené e mundu di músika lokal.
Un kos ku sí nos por bisa, manera Ray Lauffer a kanta na festival di tumba: "Uní nos ta Fuerte, Dividí nos lo ta Pèrdí””.