ADIS ABEBA, ETIOPIA, AP.- Un avion di Ethiopian Airlines a kai djadumingu, algun ratu despues ku el a lanta di e kapital Etiope. E aksidente a laga un kanal di ruina enorme riba tera i a laga 35 nashon di kaminda e 157 personanan tabata originá di dje ku doló.
No tabatin indikashon tokante e motibu pa e aksidente aki, despues ku el a lanta den bon kondishon di klima rumbo pa Nairobi, e kapital di Kenia. E aksidente tabata similar na esun di Lion Air, kual a kai den laman dilanti e kosta di Indonesia algun minüt despues ku e avion a lanta. E aksidente di Lion Air a kobra bida di 189 persona na bordo. Den ámbos kaso tabata trata di e avion Boeing 737 MAX 8.
E aksidente a pone fin na dos aña di trankilidat den shelu di e kontinente afrikano, kaminda tin problema den transporte desde basta tempu kaba. Ademas, esaki ta nifiká un gòlpi duru pa e aerolínea paraestatal Ethiopian Airlines, kual a ekspandé te kombertí den esun mas grandi i mihó den e kontinente.
E agensia migratorio di Nashon Uni a kalkulá ku mas o ménos 19 persona di e organismo mundial a muri. Tantu Adis Abeba komo Nairobi ta sentronan di trabou importante pa trahadónan humanitario, i vários persona tabata dirigiendo pa un konferensia ambiental programa pa awe na Nairobi.
