WILLEMSTAD – Un aksidente di tráfiko ku resultado fatal a tuma lugá awe mainta riba Schottegatweg Noord, na altura di Vanddis na Rio Canario. Aki un outo a dal un persona ku aparentemente a pèrdè su bida na e sitio.

Segun informashon ku EXTRA a risibí, e outo a alkansá e peaton i debí na e impakto fuerte lo a fayesé mesora. Personal di ambulans a presentá na e sitio pero no por a hasi nada mas ya ku no tabata duna señal di bida.

Polisnan tambe ta na e sitio, wardando yegada di demas outoridatnan kompetente pa sigui ku e investigashon i determiná e sirkunstansianan eksakto di e aksidente.

E aksidente a okashoná un tráfiko inmenso i te na lusnan di tráfiko na Biesheuvel tabatin fila.

Te na e momentu aki no tin mas informashon tokante identidat di e víktima. EXTRA lo sigui informá riba e desaroyonan di e aksidente mortal aki.