KRALENDIJK – E insidente di siman pasá, kaminda tres polis hóben di KPCN a saka foto di algun bòrchi ku teksto den kurá di kas di Kenneth Engelhardt, Kaya Grandi, ademas pa bis’é ku mester kita e bòrchi aki, a laga un ‘sabor amargo’ atras. Te ainda KPCN no a duna un komentario ofisial.

Komo intimidashon James Finies, lider di NKBB (Nos Ke Boneiru Bèk), a konsiderá e echo ku tres polis hóben a akudí na kas di Kenneth Engelhardt pa pidié kita e bòrchinan aki. E teksto riba e bòrchi di mes ta e motibu.

Kenneth Engelhardt  a ekspresá loke a sosodé na komienso di siman pasá na su kas. Tres polis relativamente hóben a pasa i saka potrèt na su kas i bis’é ku e tin ku kita e bòrchinan ku ta pone riba su tereno.

E tekstonan riba bòrchi no ta ofensivo, sino solamente ta enserá protesta relashoná ku maneho di Hulanda pa Boneiru. Tòg e tres polisnan aki a disidí di aktua, loke a provoká hopi interogante den e komunidat boneriano. Pregunta klave ta ken a manda nan? Nan a aktua riba instrukshon di mando polisial?

“Danki pa e pregunta. E kaso aki ta konosí serka polis i nos a kuminsá un investigashon interno pa sa ta na ki momentu i kon esaki lo a sosode”, bosero polisial Miluska Hansen a kontestá BONERIANO ora ku a pidi reakshon.

Segun e bosero, pa KPCN ta sumamente importante ku derechonan manera por ehèmpel “vrijheid van meningsuiting” (libertat di ekspreshon) ta keda respetá pa un i tur. E kaso ta sigui bou di investigashon.

“Ami no ta di akuerdo tur bia pa e forma kon NKBB ta hibando su lucha, lema i ekspreshonnan diskriminatorio ku nan ta usa. Pero e loke e polisnan a hasi ta inaseptabel. Mi a tira bista riba e tekstonan i no ta ripará ku tin algu ofensivo ku por ta rason pa a saka foto i bisa Engelhardt ku e mester kita e bòrchinan”, un siudadano a komentá na BONERIANO.

Mientrastantu tin hende ta puntra ku lo bai sigui aktua kontra e bòrchinan aki, manera esun na Nort di Saliña tokante ‘minder makambas’.