KRALENDIJK – Kruel i repudiabel, no tin otro palabra pa kuestioná e loke a sosodé durante di e anochi di djaweps pa djabièrnè na Kaminda Tra’i Montaña. Un kabes di buriku klabá na un palu di lus, un situashon sumamente tristu. Tin tur indikashon ku e buriku lo tabata enbolbí den un aksidente durante anochi. Loke ta hasi e asuntu mas repudiabel, ta ku deskonosínan a kap kabes di e buriku i kita su rabu for di su kurpa. Despues di esaki a klaba e kabes na un palu di lus i e rabu a keda bentá poko mas aleu.

Ta inkreibel kon un ser humano por hasi asina akí ku un bestia. Mester kòrda ku na Boneiru, buriku ta un bestia protehá. Ta bon pa outoridatnan kuminsá aktua, pasobra esun ku a kometé e akto akí por keda persiguí, detené i sentensiá pa maltrato di bestia ku morto komo konsekuensia. No ta e burikunan ta e problema, ta nos mes ta e problema. Tur hende sa ku buriku ta krusa kaya na momentunan inesperá, pero sí ta koriendo ku velosidat haltu, un choke ta inevitabel.

BONERIANO a buska kontakto ku e santuario di buriku, meskos tambe protektornan di animal pa un reakshon di e kaso kruel i tristu akí, pero te na siere di nos edishon no a risibí reakshon.