Desishon final na merset di minister ulandes

KRALENDIJK.- E diferente gruponan sosial den komunidat na Boneiru a yega na un akuerdo pa loke ta trata posibel oumentu di suèldu mínimo, ònderstant i tambe penshun di behes. Ta for di 2018 a lanta na Boneiru Diálogo Sentral bou di presidensia di gezaghebber Edison Rijna. Despues di a negoshá basta largu awor sektor priva, sektor empresarial, sindikatonan, Kámara di Komersio i gobièrnu di Boneiru a logra haña otro, asina e gruponan a informa EXTRA.

Ta bon pa indiká ku e partidonan a negoshá i yega na un akuerdo pero ta e minister ulandes, enkargá ku desaroyo sosial ta esun ku finalmente lo disidí riba e altura ku por subi suèldu mínimo, penshun i ònderstant. Suèldu mínimo na Boneiru ta hopi bou di e nivel sosial i pa e motibu ei tur partner sosial ta di akuerdo ku otro ku e oumentu ta mas ku nesesario.

Na Isla Riba tambe tin isla ku a negoshá i yega akuerdo entre partidonan pero na momentu ku a yega serka e minister na Ulanda esaki a kòrta den e oumentu ku partidonan a akordá ku otro.