E kombenio firmá ku Hulanda ta motibu di hopi krítika na Repúblika Dominikana

SANTO DOMINGO.-E akuerdo firmá entre Repúblika Dominikana i Ulanda a kousa un ola di krítika i debate den e pais di merengue. E ophetivo di e akuerdo ku Hulanda a firma ku RD ta pa definí e áreanan marítimo entre e dos nashon. E akuerdo ta ta motibu di diskushon kontinuo i asta e ta oumentu pasobra segun polítikonan e akuerdo tin implikashon pa soberania di RD i su rekursonan natural. E kombenio, ku ta data di 5 yüli 2021, ta definí e áreanan marítimo bou di hurisdikshon di kada nashon, segun e normanan establesé pa e kombenio di Nashonnan Uni riba derecho di laman, asina prensa ta informá na RD.

E partido Fuerza del Pueblo ta entre esnan ku ta ekspresando kritiká severo riba e akuerdo ku Ulanda. Nan ta pidi pa e kansier dominikano duna splikashon riba puntonan krusial den e akuerdo ku a sera ku Ulanda. Diputado Tobias Crespo, segun prensa di RD, a kuestioná e echo ku ni sikiera a permití pa prensa drenta e sala na momentu ku a hasi e anunsio. E diputado a indiká ku e kansier a papia pero a keda hopi superfisial riba asuntunan ku tabata meresé un splikashon mas profundo. E diputado di partido Fuerza del Pueblo ta di opinion ku Kongreso mester revisá e dokumentu minusiosamente. Ni maske e partido na mando tin mayoria, e no ta kere ku nan por permití nan mes e luho di aprobá algu di e índole aki sin revisá esaki di nobo.

Mas aleu e diputado a kuminsá kuestioná e gobièrnu di presidente Abinader puntrando si nan ta defendé interes nashonal òf ta kiko ta pasando. Crespo ta kere ku ‘e akuerdo ku Ulanda ta kontra di interes di Repúblika Dominikana”. Kongreso mester yama e kansier dominikano i kuestioná e kontenido di e akuerdo.

Di otro banda esnan ku ta sostené e aktual gobièrnu si ta kere ku Kongreso a hasi un bon trabou ampliando e límitenan marítimo di e pais. A pidi pa duna Kongreso espasio pa analisá e dokumentu. Tur hende por tin e trankilidat ku si e akuerdo no ta kumbiní RD ku Kongreso lo rechas’e.

Vise presidente di Fuerza Nacional Progresista Pelegrin Castillo a bisa ku e akuerdo ta duna RD ekstenshon di kosta i e ta faboresé Reino i su teritorionan den Karibe ku ta Kòrsou, Aruba i Boneiru. E no ta komprondé dikon no a usa e kritiero internashonal kaminda ta apliká korekshon basa riba proporshonalidat di kosta.

Ku e akuerdo aki ku Ulanda, RD a klaba su mes un kuchú pa loke ta trata e materia marítimo. E akuerdo a sende tur alarma riba e implikashon riba plaso largu pa soberania nashonal i akseso na rekursonan stratégiko manera petroli i gas natural.