ORANJESTAD.- E instituto merikano Centers for Disease Control and Prevention (CDC), a emití un nota di alerta pa biaheronan ku tin intenshon di biaha pa Aruba. CDC kontinuamente ta vigilá destinashonnan unda e komunidat merikano ta biaha pa asina trata na garantisá seguridat durante di nan biahe.

E alerta ta debí ku resientemente a registrá kasonan di Zika na Aruba. Na Aruba e alerta aki a kousa basta preokupashon debí ku ta bon konosí ku pa Aruba turismo ta sumamente importante, mas ainda si ta trata di turismo for di Merka ku ta un di e regionnan prinsipal ku ta pèrkurá pa hopi turismo pa Aruba.

EXTRA a tuma nota ku entretantu na Aruba a kuminsá investigashon ta kon por ta posibel ku funshonarionan di servisio di salubridat i medio ambiente lo por a duna tal informashon pafó te ku CDC por a tuma nota di esaki. Ta buskando e manera awor pa hasi ‘damage control’.

Pa loke ta trata e alerta ku CDC a emití pa komunidat merikano, ta asina ku e alerta a bai pa kompanianan di aviashon pa informa nan biaheronan di e peliger ku tin ora bai Aruba debí na e problema ku Zika. Asta ta atvertí hendenan na estado pa no biahe pa Aruba. Ta bon konosí ku Zika ta un malesa hopi serio ku por afektá hende i sigur mamanan na estado. E síntomanan di ZIka ta paresido na Dengue i Chikungunya ku tambe a kousa hopi dan na hende, pero tambe daño na sektor laboral mirando ku trahadónan ta keda hopi tempu sin por traha ora keda infektá ku e viro.

https://wwwnc.cdc.gov/travel/destinations/traveler/none/aruba