ALISIA CALISTER/ SEINTJE

IN MEMORIAM
ALISIA CALISTER/ SEINTJE

Ku Gran asombro nos a risibí e tristu notisia ku nos eks-kolega, sra.Alisia Calister, inesperadamente a tuma despedida di e mundu aki. Alisia, pa añanan largu a forma parti di Grupo Nos Orguyo Curacao 60+.
Na promé instante komo guia i despues pa un temporada kortiku komo miembro di direktiva i por ultimo komo miembro i a lo largo, Alisia a retirá di Grupo pa motibunan di salú.
Nos a konose Alisia komo un persona masha alegre i ku gusta ambiente. E tabata un luchadó i un trahadó inkansabel den su trabou den kuido i na bienestar di Grandinan. E tabatin un amor grandi pa e persona di edat avansá. Alisia tabata un persona masha kreativo i inventivo. Durante e biahenan ku nos grandinan semper na final, Alisia tabatin un sorpresa agradabel (den forma di bolo pretu, ko’i lechi o lèter) pa tur partisipante. E tabatin su forma uniko pa konvense Douana i pasa sin problema ku e artikúlonan .... Alisia tabata un MAESTRA den pensa i organisá eventonan di sorpresa pa agradá esnan ku eta apresiá i stima. E tabata kompositor tambe di e Himno di Grupo i a duna su aporte balioso pa engrandese Grupo Nos Orguyo Curacao 60+. Alisia a kumpli ku su mishon aki na mundu. Ela disfrutá di su bida i a hasié na su manera. Awor e ta bai djòin su kasa Camilio, kende ela stima asina tantu, den Reino di Señor. Alisia, masha, masha danki pa tur loke bo a hasi i nifiká pa Grupo Nos Orguyo Curacao 60+.
Nos lo keda rekordá bo komo un Guia ehemplar i dediká. Na su yunan, prinsipalmente: Beppie i Poppy, un danki di kurason pa tur e bianan ku boso a asistí boso Mama den realisashon di su metanan pa Grupo. Señor lo rekompensá boso. Hopi forsa i ku Dios duna konsuelo.

ALISIA, SOSEGÁ NA PAS.
Direktiva i Guianan di Grupo Nos Orguyo Curacao 60+.