MERKA.- Jada Pinkett Smith a indiká ku tin diferente esena den e pelíkula di Tupac ‘All Eyez on Me’ ku no ta kuadra ku realidat.
Den un serie di tweets e aktris, un bon amiga di e rapper ku den 1996 a keda tirá mata, a laga sa ku e no ta un fanátiko dje pelíkula.
‘Diskulpa mi’, asina Jada a tweet, ‘Mi relashon ku Pac tin muchu balor pa mi aseptá e esena nan di ‘All Eyez on Me’ komo real.
Por ehèmpel, den e pelíkula Tupac Shakur ta lesa un poesia pa Pinkett Smith, loke ta algu ku den realidat nunka a tuma lugá. ‘Mi a haña sa di e eksistensia di e poesia ora ku mi a lesa esaki den su buki’, asina Jada a aklará.
Asina Jada ta sigui splika ku “ e pelíkula ta kontené mas esena ku no ta kuadra ku realidat, manera entre otro ku riba petishon di Tupac lo mi tabata asistí na su shownan i ku nunka nos tabatin diskushon backstage”.
‘All Eyez on Me’ a keda estrená e siman aki. E pelíkula ta konta bida di e rapper Tupac Shakur, un dje músikonan mas eksitoso di mundu. Durante di ku karera musikal el a bende mas ku 80 mion albùm.