WILLEMSTAD.- Ayera nochi na Lanthùis Brakkeput Mei Mei a tuma lugá e presentashon di trahe di grupo di karnaval Alo Loco. Grupo Alo Loco lo bai partisipá na e 50 edishon di Karnaval ku e tema ‘Garden of Eden’. Tur hende ku a bishitá Lanthùis Brakkeput Mei Mei no a haña únikamente e trahe di grupo Alo Loco pa mira, pero tambe nan a risibí un tremendo show. Pa e di 50 edishon di Karnaval Grupo Alo Loco ke trese pueblo di Kòrsou bèk na e lugá di mas bunita ku a wòrdu kreá pa nos ser humano. Pero komo ku nos ser humano ta un poko kurioso i tambe un poko ‘a lo loco’ nos a wòrdu saká for di e lugá di mas bunita. Grupo Alo Loco ta kere firmemente ku den bida semper tin un segundo oportunidat pa krea un lugá bunita apesar di kualke situashon ku presentá. Pa e motibu aki grupo Alo Loco ta trese su propio kreashon di e lugá bunita yama; ‘Garden of Eden’. Durante marcha Alo Loco lo wòrdu kompaña pa ICONS, pues partisipantenan por ta sigurá di un ambiente total. Tur esnan ku kier bai karnaval huntu ku Grupo Alo Loco por registrá nan mes via di www.grupo-aloloco.com. No ta tarda pa inskribí pa bo no keda afó. Esaki te grupo, ALO LOCO!