WILLEMSTAD.- Ayera tardi e formashon musikal ‘AM Music’ a estrená e videoclip dje kansion ‘Adios me voy’. E kos eksepshonal dje videoclip ku a keda produsí kompletamente na Kòrsou ta ku el a keda filmá ku un Iphone 11 pro.
E videoclip ta trata di un hòmber ku no ke pa nan hunga ku su sentimentunan. Un dado momentu e ta kansa dje situashon i ta grita ‘Adios me voy’. Esaki ta e título dje kansion ku a keda produsí pa Oscar Bor.
E ganadó di ‘Golden Addy’, Dolph van Stapele di Fisheye Media Productions a bèl Oscar na momentu ku el a tende e kansion i a bisé ku e ta haña e produkshon un kampion i a ofresé pa graba un videoclip.
Dolph a pidi su amigu Bas Nuissl pa huntu nan pensa riba un konsepto i a tuma e filmashon i direkshon dje produkshon na su enkargo. Riba e pregunta na Dolph relashoná ku e grabashon usando un telefòn el a bisa: ‘Mi a mira kon Selena Gomez a graba su mas resien videoclip usando un Iphone i mi a pensa mesora ku bo no ta mira nada di esei den e produkshon final’. Dolph kier a tèst e Iphone den tur situashon. Kon e telefòn lo reakshoná anochi, pero tambe bou dje kondishon di tempu ku hopi solo den dia aki na Kòrsou. Awó bo ta mira kiko di bèrdat e telefòn por.
Riba e pregunta si den futuro lo e pone su kámara di filmashon un banda, van Stapele ta kontestá ‘Sigur ku no, pero den kuadro dje desaroyonan riba e tereno sinematográfiko aki na Kòrsou e ke enkurashá e hendenan pa konta nan historia i pa esaki no ta semper bo mester dje aparatonan di mas karu. E ta kuminsá na un bon kuenta, téknika ta hasi posibel pa bo por demostrá bo talento ku un ‘budget’ abou.