WILLEMSTAD.- Ayera nochi den kurá di Licores Maduro a tuma lugá e tradishonal entrega di premio di Festival di Tumba 2018. Músikonan, kantantenan ku a kai den premio i invitadonan a yena e kurá di Licores Maduro pa dje forma ei presensiá e repartishon di premio. Minister di Kultura, Sra. Alcalá-Wallé, Minister di Ekonomia, Sr. Steven Martina i brandingpartnernan tur a gaba kon bon organisá e festival di aña aki tabata i a brinda nan sosten na e festival pa 2019. Sr. Robert de Jesus ayera nochi a risibí un plakat di estímulo pa su kontribushon na Festival di Tumba. Despues dje parti di diskurso a sigui e entrega di premio na e finalistanan i Rei di Tumba, Urvin ‘Luwi’ Jano. Riba foto nos por apresiá e diferente finalistanan na momentu di risibí nan premio.