WILLEMSTAD.- Un dje personanan ku a nifiká hopi pa kultura di Kòrsou ta Sra. Jeanette Kroes kende a nanse 1 di mart di  aña 1929. Konosí komo Mvr Kroes, ela yuda forma masha hopi pianista mes na Kòrsou komo dosente di piano.
E ta dunando lès na Muziekschool for di 2 di Sèptèmber di 1974 kua ta nifiká 43 aña den servisio. El a duna lès na mas ku 500 mucha na tur den e 43 añanan ku e tin komo dosente.
Su tòp studiantenan ta Randal Corsen kende un i tur sa kon el a desaroyá su karera den músika despues di a bai Ulanda i gradua na konservatorio. Tin tambe Jahier Konter ku tambe a kaba konservatorio na Ulanda. Den kaso di Jahier Konter e  ta dunando lès aworakí na konservatorio na Ulanda.
Otro studiante di dje ku sigur a sabi na profilá den farándula di Kòrsou ta Linmarvin Martina. Abogado mr. Karly Bertrand ta otro dje studiantenan ku a logra di kue tur e gradonan di lès di piano serka Sra. Kroes.
Sherwin Faneite kende ta kondusí e programa di farándula “E Mulina Farandulero” na Radio Active 104.5 FM a tuma nota di e kontribushon grandi di Sra.  Kroes i den e kuadro aki el a disidí pa den su programa na Radio Active a dun’é un plakat di mérito.
Djamars anochi di forma sorpresivo e tabata presente den studio di Radio Active, paso e no tabata sa kiko ta e okashon. Ku hopi humildat i emoshon el a risibí su plakat di mérito i mester bisa ku famia di Sra. Kroes a apresiá hopi e rekonosementu ku a duna e gran baluarte.
E plakat di mérito a keda entrega pa Manfred Gomes kende ta presidente dinámiko di AMAK kende ku hopi honor a aseptá e invitashon pa ser esun ku  a entreg’é esaki.
Mester bisa ku  apesar di Muziekschool ta asina ku Sra. Kroes ta toka den 3 diferente misa for di 1964. Ainda e ta toka den misa 2 biaha pa siman, ántes tabata 4 biaha pa siman.
AMAK ta felisitá Sherwin Faneyte pa e echo ku pa medio di su programa “E Mulina Farandulero” por a duna e homenahe meresí aki na Sra. Kroes. AMAK ta felisitá Sra. Kroes ku su rekonosementu bon meresí i ta gradisí Julius Koko i Sherwin Faneyte pa e inisiativa aki.