WILLEMSTAD.- Ayera nochi AMAK, Asosashon di Músiko i Artista di Kòrsou a tene nan promé rueda di prensa relashoná ku Festival di Tumba 2018 na Licores Maduro.
Sr. Feco Gomes durante di su disertashon a enfatisá ku Festival di Tumba durante dje último añanan finansieramente ta dependé di tres pila, e promé: benta di karchi; e di dos: abonadonan di ‘Pay per View’ i di tres ta e sosten finansiero di brandingpartnernan.
Despues ku UTS a anunsiá ku nan lo no por ta un ko partner pa organisá Festival di Tumba, direktiva di AMAK a mobilisá pa por garantisá kontinuashon dje festival.
Aworakí AMAK ta responsabel pa tantu organisashon komo produkshon di Festival di Tumba 2018. Deliberashon i trámitenan pa aserka posibel partnernan a produsí te na e momentunan aki konfirmashon di tres ‘brandingpartnernan’ ku ta: Hucor Holding, Ofisina di Turismo i Licores Maduro.
Den e próksimo dianan ta spera konfirmashon di dos partner mas. Pa por kubri tur gastu i produkshon i hasi posibel ku e final di Festival di Tumba por keda transmití den ‘aire liber’ pa televishon, ta nesesario pa haña sosten di 7 branding partner. AMAK ta hasiendo su máksimo esfuerso pa banda di esnan ku lo kaba di konfirmá e siman aki, logra haña 2 ‘brandingpartner’ mas pa pueblo por haña transmishon liber riba e anochi final di Festival di Tumba 2018, riba djabièrnè, 26 di yanüari 2018.

BENTA KARCHI
Pa loke ta trata e pre-benta di karchi mester menshoná ku ámbos ‘gimmick’ riba dianan 2 i 16 di desèmber a bai hopi bon, te hasta hopi mas mihó ku añanan anterior. Pa evitá entradanan ilegal mas tantu posibel e aña aki a opta pa introdusí un sistema di ‘barcode’ riba e karchinan i lo tin kontròl via di un sistema digital na entrada.
Inovashon pe aña aki tambe ta benta di karchi via di e wèpsait: www.ticketscaribbean.com, esaki ta hasi posibel pa esnan ku ta den eksterior i ta pendiente pa bin disfrutá di festival di tumba pa nan kumpra nan karchi delantá.

INSKRIPSHON
Inskripshon pa Festival di Tumba ta tuma lugá dia 14 di yanüari 2018 i ya kaba trabounan pa drecha e infrastruktura tantu paden i pafó di Festival Center a kuminsá. AMAK ta kombensí ku Festival di Tumba 2018 ta bai bira un grandi i eksitoso.